Imbatad ni House Speaker Faustino “Bojie” Dy III ita nga aldaw, Disiembre 17, a saan a pudno dagiti ibagbaga ti dadduma nga adda maisingsingit a pondo iti maar-aramid a deliberasion ti Bicameral Conference Committee (bicam) iti badiet ti Department of Public Works and Highways (DPWH) para iti 2026.
Dinakamat ni Dy dagiti report a mangiparparipirip a sililimed a naynayonan dagiti mammanday-linteg ti pondo wenno probision iti proseso ti bicam, ket kinunana a saan a pudno, mangallilaw, ken di umisu ti pannakaiparang dagitoy iti proseso no kasano a mabukel ti nailian a badiet.
Impaganetgetna nga amin nga item iti bersion ti Kamara iti badiet ket nagdalan iti umno a proseso ken inanamongan dagiti kameng ti Kamara sakbay pay a mangrugi ti bicam.
Inlawlawag ni Dy a panggep ti bicam a pagtunosen dagiti nagduma a bersion ti Kamara ken Senado iti badiet, saan a tapno mangiserrek iti baro wenno isingit ti saanda a napagnunumuan.
₱6.793-trilion a 2026 national budget, maanamongan iti ngudo ti tawen
Itay kallabes, dinakamat ti Philippine Center for Investigative Journalism (PCIJ) ni Dy a kongresman ti 6th district ti Isabela, nga addaan iti kadakkelan nga insingit iti badiet ti DPWH iti 2026, nga agbalor iti ₱23 a bilion.
Ngem kinuna ni Dy nga awan ti illegal, wenno nailemmeng, wenno panangallilaw a maar-aramid iti biangda, ket agtalinaed ti proseso a maiparang iti amin ken naurnos. (Ellson Quismorio/Manila Bulletin//Lito Hilidon/Bannawag)
