Imbilin ti Korte Suprema (SC) ita nga aldaw, Disiembre 17, a rumbeng a mayallatiw ti di mapiansaan a kaso a malversation of public funds ken graft a maibusor ken ni Cesarah Rowena “Sarah” Discaya ken iti walo nga opisial ti Davao Occidental District Engineering Office ti Department of Public Works and Highways (DPWH), manipud iti Davao Occidental regional trial court (RTC) maipan iti Lapu-Lapu City RTC.
Maibasar daytoy iti pagannurotan nga impaulog ti SC a rumbeng a mayakar iti kaasitgan nga anti-graft court ti kaasitgan a judicial region dagiti kaso ti panagkunniber kadagiti proyekto iti impraestruktura.
Itay kallabes, indatag ti Ombudsman ti kaso a malversation ken graft a maibusor ken ni Discaya ken kadagiti kakaduana iti Davao Occidental RTC.
Nasuspenso iti las-ud ti innem a bulan dagiti opisial ti DPWH gapu kadagiti administratibo a kasoda. Ni DPWH Secretary Vince Dizon ti nangipaulog iti suspension order dagiti nadakamat nga opisial ti DPWH kalpasan ti pananginspeksionna iti Davao Occidental. (Rey G. Panaligan/Manila Bulletin//Lito Hilidon/Bannawag)
