Imbilin ita ti Office of the Ombudsman (OMB) ti pannakasamsam ti selpon ken dadduma pay a gadget ni pimmusay nga undersecretary ti Department of Public Works and Highways (DPWH) Maria Catalina Cabral a nasarakan a natay iti Benguet.
Kinompirmar dagiti autoridad ti pannakatay ni Cabral ita a Disiembre 19.
Iti mensahena kadagiti reporter, kinuna ni Assistant Ombudsman Mico Clavano a kasapulan a maalada ti selpon ken dadduma pay a gadget ni Cabral uray ania ti mapasamak.
Segun ken ni Clavano, binilinda dagiti autoridad iti Banguet nga alaen ken salaknibanda ti selpon ken dadduma pay a gadget ni Cabral tapno mayawatto kadagiti imbestigador.
Pannakatay ni dati a DPWH Usec. Cabral, maim-imbestigar
Nasarakan dagiti autoridad ni Cabral nga awan ti puotna iti igid ti Bued River, 20 agingga 30 a metro iti baba ti highway.
Maysa ni Cabral kadagiti opisial ti DPWH nga im-imbestigaren ti Ombudsman mainaig iti binilion ti balorna a “ghost flood-control project” nga impatungpal ti DPWH.
Iti sabali a bangir, indagadag ti Independent Commission for Infrastructure (ICI) kadagiti autoridad nga imbestigarenda ti pannakatay ni Cabral, tapno makitada no adda foul play iti pannakatayna. (Czarina Nicole Ong Ki/Manila Bulletin//Lito Hilidon/Bannawag)
