Napinget ti panagimbestigar ti polisia iti pannakatay ni dati nga Undersecretary ti Department of Public Works and Highways (DPWH) Maria Catalina Cabral.
Nasarakanda ni Cabral nga awan puotna iti 30 a metro ti kaunegna a rangkis iti Bued River iti Kennon Road iti Sitio Maramal, Barangay Camp 4, iti Tuba, Benguet idi 8:00 iti rabii iti Disiembre 18.
Daytoy met la a lugar ti ininspeksion ni Presidente Marcos Jr. idi Agosto 24, 2025, mainaig iti mapapati nga anomalia ti rock nettings.
Dagiti kameng ti Tuba Municipal Police Station ken Baguio City Police Office, agraman dagiti kameng ti Tuba Municipal Disaster Risk Reduction and Management Office (MDRRMO) ken Bureau of Fire Protection (BFP), ti nangyaon ken nangitaray ken ni Cabral iti ospital ngem indeklarar ni Dr. Gian Frances Salinas a natayen ni Cabral iti 12:03 iti parbangon ti Disiembre 19.
Ombudsman, imbilinna ti pannakaala ti selpon, gadget ni Cabral
Suksukimaten met ti polisia no nagpakamatay ni Cabral.
Segun iti drayber ni Cabral a ni Cardo Hernandez, agbibiaheda a mapan iti Baguio City iti tengnga ti aldaw ti Disiembre 18 idi impaisardeng ni Cabral ti lugan iti igid ti Kennon Road a yan dagiti kontrobersial a rock nettings. Rimmuar ni Cabral iti lugan sa nagtugaw daytoy iti concrete barrier iti igid ti kalsada.
"Ma'am dika unay umasideg ta amangan no dim' matimbeng ti bagim ket matnagka," imbalakad ni Hernandez.
Nagsublida iti lugan ket kinuna dagiti polis a saandan nga agbayag sadiay. Napanda iti Baguio City, nangaldaw iti maysa a restauran, ken nag-check in-da iti maysa a hotel iti Legarda Road.
Segun ken ni Hernandez, nagsublida iti lugar (Kennon Road) iti agarup 2:30 iti malem.
Nagtugaw manen ni Cabral iti conrete barrier ket imbilinna ken ni Hernandez a panawanna daytoy. Pimmanaw ni Hernandez ket napan iti maysa a paggasolinaan.
Idi nagsubli ni Hernandez iti lugar, awanen ni Cabral. Sinapulna iti lugar ngem dina latta mabirokan ni Cabral.
Nagsaludsod iti maysa a tao iti lugar ngem saan kano met a nakita daytoy ni Cabral. Binirbirok ni Hernandez ti amona iti lugar ngem saanna latta a makita.
Nagsubli ni Hernandez iti hotel iti 5:00 iti malem, ngem awan sadiay ni Cabral.
Nagsubli manen ni Hernandez iti Kennon Road, ngem saanna latta a mabirokan isu a nagpatulongen kadagiti polis.
Insayangkat dagiti polis iti search operation ket nasarakanda ti bagi ni Cabral iti baba ti rangkis.
Nagsangit ni Hernandez iti nakitana ti bagi ni Cabral nga inyaon dagiti autoridad manipud iti rangkis.
Naipanen ti bangkay ni Cabral iti maysa a puneraria iti Baguio City.
Isaysayangkat met ti Benguet Provincial Forensic Unit ti panangprotektardada iti scene-of-the-crime. (Zaldy Comanda/Manila Bulletin.//Lito Hilidon/Bannawag)
