Patien unay dagiti medical expert a “fit to participate” ni dati a presidente Rodrigo R. Duterte iti pre-trial proceeding ti International Criminal Court (ICC), agraman iti confirmation hearing.
Ti grupo dagiti eksperto, a buklen dagiti agwaywayas ken kualipikado nga eksperto, ket dinutokan ti Pre-Trial Chamber I a mangtingiting iti kasasaad ti salun-at ni Duterte gapu iti kinuna ti abogadona a saanna a kabaelan ti sumango iti pannakausig gapu iti panagkapuyen ti panunotna.
Maibasar iti dokumento ti korte a naipablaak idi Disiembre 18, tallo a medical expert ti nanginterbiu, nangsukimat, ken nangadal iti kasasaad ni Duterte manipud Oktubre 8 agingga Nobiembre 18.
Kalpasanna, nagpapada ti nagbalin a konklusion dagiti medical expert a, nupay nakapuy ken lakayen ni Duterte, addaan latta kadagiti kasapulan a kapasidad a mangipakat iti kalinteganna iti proseso ken iti patas a pannakausig.
Kasapulan ti natibker ken nainkalintegan a pagtaktakderan iti parikut iti WPS --NMC
Tunggal maysa kadagiti medical expert ket nangipaay iti konklusionda a matarusan ni Duterte dagiti kasona, dagiti ebidensia, ken ti panggep ti pre-trial proceeding, agraman ti panangbilin iti abogadona a mangisagana iti depensana.
"Nabatad ken nagkaykaysaanda dagitoy a natakuatanda, ket maiparbeng a pagibasaran ti Pre-Trial Chamber, a mangikeddeng a kabaelan ni Duterte ti sumango iti pannakausig," segun iti dokumento.
Iti sabali a bangir, kinuna ti kampo ni Duterte nga adda pay kayatda a lawlawagen sakbay nga usarenna ti pangngeddeng dagiti medical expert iti kasasaad ni Duterte, a nangdakamat kadagiti "di panagtutunos" a nakaibasaran ti tunggal kameng ti medical expert kadagiti konklusionda.
Segun ken ni Nicholas Kaufman nga abogado ni Duterte, kiddawenda a maisayangkat ti evidenciary hearing, nga idiay masapul a lawlawagen dagiti eksperto dagiti konklusionda, ti nangitunda iti konklusionda, ti wagas nga inusarda iti pananginterbiuda ken ni Duterte, ken no kasano a naibaga kenkuana dagiti instruksion. (Joyce Ann L. Rocamora/PNA//Lito Hilidon/Bannawag)
