Dinayaw ni Police Lt. Gen. Jose Melencio C. Nartatez Jr., acting chief ti Philippine National Police (PNP), ti integridad nga impakita dagiti operatiba ti Highway Patrol Group (HPG) a nagkedked iti ₱5 a milion a pasuksok tapno mapalusposan koma ti ₱143 a milion a balor ti naipuslit a sigarilio a nasamsamda iti Quezon City idi Disiembre 17.
Segun ken ni Nartatez, ti saan a panangawat dagiti empleado ti HPG iti pasuksok ti mangipakita iti kinapropesional ti entero a polisia.
Idi Disiembre 17, insayangkat dagiti operatiba ti HPG ti maysa nga operasion, maigapu iti naawatda nga intelligence report, iti G. Araneta Avenue iti Quezon City a nangitunda iti pannakasanebda iti dua a trailer truck a naglaon iti puslit a sigarilio.
Segun iti naawatda a report, mapapati a naggapu dagiti kargamento iti baybay a paset ti Bauan, Batangas, ket agturong iti Valenzuela City.
Dati a presidente Duterte, 'fit to participate' iti ICC, segun kadagiti medical expert
Kalpasan ti pananginspeksion dagiti kameng ti HPG, natakuatanda a saan a nakarehistro dagiti trak a nangibiahe iti 2,000 a kahon ti sigarilio a patienda nga awan ti dokumentona ken illegal a naangkat.
Kalpasan ti pannakakemmeg dagiti suspek, imparipirip kadakuada dagiti maipagarup nga akinkukua iti kontrabando a palubosanda nga iruar ti kontrabando ket adda kasukatna a gatad.
Tallo a tao ti naibaon a mangted iti ₱5 a milion a pasuksok iti Camp Olivas iti Siudad ti San Fernando, Pampanga ngem naarestarda amin, ta maysa gayam nga entrapment operation ti naaramid.
Agtalinaed dagiti suspek iti kustodia dagiti autoridad bayat nga isagsaganada dagiti kaso a mabalin a maipila a maibusor kadakuada. (Aaron Recuenco/Manila Bulletin//Lito Hilidon/Bannawag)
