Nasentensiaan ti maysa a padi a Katoliko iti 120 a tawen a pannakaibalud gapu iti panangramesna iti menor de edad iti Baguio City idi Marso 2023.
Iti pangngeddeng nga impaulog ti Baguio City Regional Trial Court idi Disiembre 17, natakuatanda a nagbasol ti padi iti tallo a kaso ti panangrames (nga agingga iti 40 a tawen ti sentensia ti tunggal kaso), ket imbilin ti korte a mayakar a dagus ti padi iti New Bilibid Prison iti Muntinlupa City.
Agmulta ti padi iti ₱75,000 a civil damage, ₱75,000 a moral damage, ken ₱75,000 tunggal kaso kas exemplary damage iti tunggal maysa a kaso. nga addaan iti interes nga innem a porsiento kada tawen manipud iti panagbalin a pinal ti desision agingga a mabayadanna amin a gatad.
Ti biktima, a maysa nga estudiante a babai nga agtawen iti 16, ket aggigian iti Bishop’s house compound idi maipagarup a rinames isuna ti padi iti Marso 2023.
Dati a presidente Duterte, 'fit to participate' iti ICC, segun kadagiti medical expert
Inlibak ti padi ti pammabasol kenkuana, ngem natakuatan ti korte a natibker dagiti testimonia ken ebidensia nga imparang ti biktima. (Zaldy Comanda/Manila Bulletin//Lito Hilidon/Bannawag)
