Inkari ti Philippine National Police (PNP) ita nga aldaw, Disiembre 22, a sapulenda dagiti kameng ti gun-for-hire a sindikato a mapapati a nairaman kadagiti nangpapatay iti maysa nga opisial ti polis ken nangdangran iti dua pay a kaduana iti maysa a rinnupak iti Candelaria, Quezon.
Napapatay ni Patrolman Ron Jay Chavez ti First Quezon Provincial Mobile Force Company (First QPMFC), idinto a nadangran dagiti kakaduana a da M/Sgt. Sonny Caringal ken Patrolman Kim Kenneth Averia, kalpasan a pinaltogan ida ti armado a grupo bayat ti panagpatruliada iti Sitio Pulyok, Barangay San Isidro idi Disiembre 19.
Maibasar kadagiti report, nadlaw dagiti tallo a polis dagiti mapagduaduaan a tao bayat a nagpatruliada iti asideg ti plantasion ti saba. Immasideg kadakuada dagiti suspek a nagtagiigam iti M16 rifle ken pistol, ket pinaltoganda dagiti tallo a polis.
Segun ken ni PNP acting chief Lt. Gen. Jose Melencio Nartatez, daytoy a pasamak ti mangipalagip kadakuada iti peggad nga inaldaw a sanguen dagiti polis kas panangipatungpalda iti annongenda.
Mapukpukaw a nobia, nasarakan iti Pangasinan
Personal a sinarungkaran ni Nartatez ken dagiti dadduma pay nga opisial ti PNP dagiti nadangran a polis iti United Candelaria Doctors Hospital iti Disiembre 21.
Sadiay metten nga impaay ni Nartatez ti Medalya ng Sugatang Magiting ken ti Medalya ng Kadakilaan kas panangbigbig iti tured ken sakripisio dagiti polis iti panangipatungpalda iti annongenda, ken tulong pinansial para iti panagpaimbagda.
Binilin ni Nartatez ti PRO4A ken ti Quezon Police Provincial Office nga isayangkatda ti nainget nga intelligence operation kontra kadagiti sindikato ken dadduma pay nga armado a grupo iti rehion.
Impaganetget ni Nartatez a madusanto dagiti akin-aramid iti pannakapapatay ni Chavez.
Napapatay met iti follow-up operation nga insayangkat ti Quezon Police Provincial Office ti maatap a lider ti grupo a ni alias Mark. Naala dagiti autoridad dagit paltog iti abandonado a lugan bayat ti agtultuloy nga operasionda a panangsawar kadagiti natda a kameng ti grupo. (Christopher Lloyd Caliwan/PNA//Lito Hilidon/Bannawag)
