Kaso a plunder, graft, ken technical malversation ti naipila kontra kada dati a sekretario ti Department of Finance (DOF) Ralph Recto ken Philippine Health Insurance Corporation (PhilHealth) President and Chief Executive Officer Emmanuel R. Ledesma Jr., iti Office of the Ombudsman (OMB) ita nga aldaw, Disiembre 22.
Ti kaso ket impila ti grupo a Save the Philippines Coalition babaen da Irene Ann C. Caballes, Elmer B. Jugalbot, Gerlyn Acedo Ogong, Emerita C. Pecson, Susan S. Villar, Mussolini S. Lidasan, Jose Jessie Olivar, ken Jaime L. Miralles.
Segun iti darum, nakabasol da Recto ken Ledesma gapu iti pannakayakar ti ₱60 a bilion a surok a pondo ti PhilHealth iti National Treasury.
Itay nabiit, indeklarar ti Korte Suprema (SC) nga unconstituional ti pannakayakar ti pondo ket imbilinna a maisubli daytoy iti PhilHealth, ken imparitdan ti pannakayakar ti natda pay a ₱29.9 a bilion.
PNP, nagkari a maipaay ti hustisia kadagiti kakaduada a natay, nadangran iti rinnupak iti Quezon
Winaswas ti SC ti special provision iti 2024 General Appropriations Act (GAA) a nangipalubos iti pannakaisubli ti surok a pondo dagiti government-owned or controlled corporations (GOCCs) iti National Treasury tapno maponduan dagiti unprogrammed appropriations iti 2024 GAA.
Gapu iti daytoy, nawaswas met ti Circular No. 003-2024 nga impaulog ti DOF a nangibilin iti pannakayakar ti ₱89.9 a bilion a pondo ti PhilHealth iti National Treasury.
Kiniddaw ti grupo iti OMB a nasken a madusa da Recto ken Ledesma gapu iti panaglabsingda iti Republic Act No. 7080 kas inamendaran ti Republic Act No. 7659 mainaig iti plunder; Section 3(e) of RA 3019, ti Anti-Graft and Corrupt Practices Act, para iti graft; iti Article 220 of the Revised Penal Code iti technical malversation; ken iti RA 6713 para iti kaso a grave misconduct. (Czarina Nicole Ong Ki/Manila Bulletin//Lito Hilidon/Bannawag)
