Itultuloy ti Quezon City Police District (QCPD) ti nainget a panagimbestigarda iti pannakapukaw ni Sherra De Juan, ti nobia a nai-report a nagpukaw itoy a bulan, sakbay ti naituding a pannakikasarna.
Naudi a nakita ni De Juan idi Disiembre 10 iti 1:30 iti parbangon iti maysa a paggasolinaan iti nagsulian ti Commonwealth Avenue ken Atherton Street iti North Fairview, Quezon City.
Kalpasan a naireport ti pannakapukawna, nangisayangkat ti QCPD iti digital forensic examination iti selponna kas paset ti maar-aramid nga imbestigasion.
Maibasar iti forensic analysis ti QCPD, natakuatanda nga adda personal a parikut ni De Juan sakbay ti panapukawna.
Recto, Ledesma, naidarum iti plunder, kaso a kriminal gapu iti pannakayakar ti ₱60-bilion a pondo ti PhilHealth
Nakita dagiti imbestigador ti emosional a pakadukotan ken pinansial a pakarigatan, a maipagarup a mainaig iti kasasaad ti salun-at ti amana ken ti pannakariribuk iti umadani a pannakikallaysana.
Iti panangadal ti QCPD iti laptop ni De Juan, natakuatanda a sakbay ti pannakapukawna, nagsuksukimat ni De Juan iti online mainaig kadagiti agas a mabalin a mangitunda iti ipapatay, ti epekto ti pannaka-over dose iti agas, ken dagiti kaarngina a topiko.
Impaganetget dagiti autoridad a dagitoy a natakuatanda ti mangbukel iti sapasap a panangsukimatda iti kaso ken tamingenda daytoy a siaannad ken siiinget. (Allysa Nievera/Manila Bulletin//Lito Hilidon/Bannawag)
