Pinatalgedan ti Korte Suprema (SC) ti pannakakombiktar dagiti tallo a polis a nangpaltog ken nangpapatay ken ni 17 ti tawenna a Kian delos Santos iti Caloocan City bayat ti operasion kontra iti illegal a droga idi 2017.
Sinentensiaan ti regional trial court (RTC) ken ti Court of Appeals dagiti tallo a polis iti reclusion perpetua, wenno 40 a tawen a pannakaibalud.
Inanamongan ti SC ti pannakasentensia dagiti police officer a da Arnel G. Oares, Jeremias T. Pereda, ken Jerwin R. Cruz. Maibaludda iti 40 a tawen, ken bayadanda ti pamilia Delos Santos iti ₱275,000 kas danios.
Segun iti SC, saan a nagtignay dagiti polis a maitunos iti pagrebbenganda, ngem uray pay no kasta man, saan a masapul ken saan a nainkalintegan a papatayenda ni Kian.
Mapukpukaw a nobia, nasarakan iti Pangasinan
Kuna ti SC a ti panangpapatay iti menor de edad ket saan a maibilang nga estandarte iti operasion, ket saan a mairaman ti panangpapatay iti panagtungpal iti annongen.
Saan nga inawat ti SC ti argumento ni Oares a tungtungpalenna laeng ti annongenna, ta mayaplikar laeng daytoy a depensa no agpayso a saanen a maliklikan a resulta ti nainkalintegan a tignay ti polis. (Rey G. Panaligan/Manila Bulletin//Lito Hilidon/Bannawag)
