Maibilangen a naglusulos iti Philippine National Police (PNP) ni Police General Nicolas Torre III kalpasan nga inawatna ti puesto a kas general manager ti Metropolitan Manila Development Authority (MMDA), segun iti National Police Commission (Napolcom).
Kinuna ni Ralph Calinisan, bise chairman ken chief executive officer ti Napolcom idi Sabado, Disiembre 27, nga iti panaglusulos ni Torre, agbalinen a full time a hepe ti PNP ni Police Lt. Gen. Jose Melencio C. Nartatez, Jr. ken agbalin a naan-anay a heneral nga addaan ranggo a 4-star.
Nadutokan ni Torre kas hepe ti PNP idi Mayo 2025 ngem agarup tallo a bulan kalpasanna, nasukatan gapu iti isyu ti reorganisasion a nakairamanan dagiti nangato nga opisial ti PNP, pakairamanan ni Nartatez a naikkat idi kas maika-2 a kangatuan nga opisial ti PNP.
Naisaad met idi agangay ni Nartatez a kas acting PNP chief ngem dina nagun-od ti ranggo a 4-star a heneral ta aktibo pay laeng iti serbisio ni Torre. Inton Marso 2027 pay laeng ti panagretiro da Torre ken Nartatez.
Senado, pinasingkedanna ti ₱6.793-trilion a nailian a badiet para 2026
Iti babaen ti linteg a nangbukel iti PNP, maysa laeng a 4-star general ti mapalubosan iti PNP ket idi naikkat ni Torre kas kangatuan ti ranggona a polis iti pagilian, naibilang nga addaan iti non-duty status. (Aaron Recuenco/MANILA BULLETIN)
