Nasarakanen ti mapukpukaw a nobia a ni Sarah "Sherra" De Juan iti ili ti Sison, Pangasinan, segun iti Quezon City Police District (QCPD) idi malem ti Lunes, Disiembre 29.

Naireport a mapukpukaw ni De Juan kalpasan a pimmanaw iti pagtaenganda iti Quezon City idi malem ti Disiembre 10 tapno gumatang iti sapatos a para iti kasarna.

Agkasar koma idi Disiembre 14 da De Juan ken ti nobiona iti sangapulon a tawen a ni Mark Arjay Reyes.

Napanen iti Pangasinan dagiti personnel manipud iti QCPD Police Station 5, a kaduada ti pamilia ni De Juan ken ti nobiona, tapno yawidda daytoy.

Nasional

Diosdado Banatao, Cagayano a computer genius, entrepreneur, pimmusay

Segun ken ni QCPD acting chief Police Colonel Randy Glenn Silvio, impadamag ti pamilia ni De Juan nga adda sibilian a nakiuman kadakuada.

"Immay kadakami ti nobio ni Ms Sherra ken ti kabsatna ket inreportda nga adda immawag kadakuada a nakasarak ken ni Ms Sherra iti probinsia ti Pangasinan,” kinuna ni Silvio iti maysa nga interbiu.

Pinasingkedanna a sibibiag ni De Juan nupay di pay la agtutunos dagiti sasawen daytoy.

Segun iti QCPD, mairuar ti nayon nga updates apaman a natalged a mayawid ni De Juan iti pagtaenganda. (Allysa Nievera/MB)