Pinasingkedan ti Senado idi Disiembre 29, 2025 ti report ti Bicameral Conference Committee (bicam) iti 2026 General Appropriations Bill (GAB) a nangisingasing iti ₱P6.793 a trillion a nailian a badiet para iti 2026.
Maipatulod ti ratified version ti 2026 GAB iti Malakanyang para iti pirma ni Presidente Ferdinand Marcos Jr.
Iti maysa nga interbiu, kinuna ni Senate Finance Committee Chairman Senator Sherwin Gatchalian a tallo a senador ti saan a nagpirma iti bicam report, da Sen. Ronald dela Rosa, Sen. Christopher Go ken Sen. Imee Marcos.
Dua pay a kameng ti minority bloc, da Sen. Rodante Marcoleta ken Sen. Robinhood Padilla, ti nagbotos kontra iti ratification.
Phivolcs: Bulkan Mayon, nagtalinaed nga aktibo
Kinuna ni Gatchalian a nagtalinaed a napudno ti bicam panel iti panagkumitna a mamagbalin iti sektor ti edukasion a kadakkelan ti puonanna iti 2026 national budget, nga addaan iti dagup a pondo a dumanon iti ₱1.35 a trilion. Impaganetgetna nga ibagian daytoy nga alokasion ti historiko a 4.4 a porsiento ti gross domestic product, a mangiwayat kadagiti addang a mangkissay iti classroom backlog, napalawa a pannakaipatungpal ti School-Based Feeding Program para iti minilion a malnourished nga estudiante, ken panangsigurado a maaddaan tunggal agad-adal iti access kadagiti bukodda a textbook.
Intampok pay ni Gatchalian ti napapigsa nga alokasion para iti sektor ti salun-at, nga itan ket agdagup iti ₱447.6 a bilion iti sidong ti naitunos a bersion ti badiet. Iti daytoy a gatad, makaawat ti Philippine Health Insurance Corporation (PhilHealth) iti ₱129.78 a bilion, a 15 a porsiento ti ngatuanna no idilig iti inaprobaran ti Kamara a General Appropriations Bill level. Kinuna ni Gatchalian a ti nayon a ₱16.5 a bilion para iti PhilHealth ket naggapu iti realignment ti badiet ti Department of Public Works and Highways (DPWH).
Pinadayawan ni Gatchalian dagiti vice chairperson ti Finance Committee a da Sen. Pia Cayetano ken Sen. Loren Legarda, kasta met ni Sen. Risa Hontiveros, gapu iti panangiganetgetda iti pannakaingato ti pondo dagiti nasao a sektor.
Innayonna a naingato ken napalawa met ti pondo para iti Zero Balance Billing kadagiti ospital ti Department of Health (DOH) tapno masakup dagiti napili a local government unit, bayat a nanayonan met ti alokasion para kadagiti specialty hospital para iti panaggatang kadagiti kasapulan a medikal nga alikamen ken pannakapasayaat dagiti serbisio publiko.
Iti sektor ti agrikultura, kinuna ni Gatchalian a mailasin iti ₱214.39 a bilion, ti kangatuan nga alokasion iti las-ud ti nasurok a maysa a dekada. Inlawlawagna a ti immadu a pondo, mangsuportar kadagiti programa a nairanta a mangpasayaat iti matgedan dagiti mannalon ken mangpapigsa iti national food security, pakairamanan ti credit insurance ken direct market access initiatives. Segun iti senador, ikagkagumaan ti badiet nga itag-ay ti kalidad ti biag dagiti agpatpataud iti taraon ti pagilian, ken binigbigna ni Sen. Francis Pangilinan kadagiti rekomendasion daytoy para iti pannakasukog ti badiet ti agrikultura.
Maitunos iti people-centered thrust ti plano ti panaggasto, kinuna ni Gatchalian a nagtalinaed a natibker ti pondo para kadagiti serbisio sosial, a dinakamatna ti pannakaingato ti National Disaster Risk Reduction and Management Fund iti ₱39.8 a bilion. Ibagian daytoy ti ₱10.5 a bilion a ngatuan manipud iti bersion ti Kamara, a pakairamanan ti ₱4.2 a bilion a realignment manipud iti badiet ti DPWH. (Dhel Nazario ken Hannah L. Torregoza/MB)
