Inarestar dagiti polis ni retirado a heneral ti Air Force Romeo Poquiz, a naakusaran a mangsugsugsog kadagiti aktibo a soldado tapno ikkatendan ti suportada ken ni Presidente Ferdinand Marcos Jr iti baet dagiti alegasion ti nasaknap a panagkunniber, partikular iti flood control projects.
Kinuna ni Police Lt. Gen. Jose Melencio Nartatez, Jr., acting chief ti Philippine National Police (PNP) a nakemmeg ni Poquiz maibatay iti arrest warrant nga impaulog ti Branch 77 ti Quezon City Regional Trial Court gapu iti kaso a panangsugsog a mangtippuog iti gobierno wenno inciting to sedition.
Naggapu ni Poquiz, a kaduana ti pamiliana, nagbakasion iti Thailand idi inserbi dagiti operatiba ti Criminal Investigation and Detection Group (CIDG) ken Aviation Security Group ti arrest warrant apaman a nakasangpet daytoy iti Terminal 3 ti Ninoy Aquino International Airport (NAIA) itay alas otso iti bigat ita a Lunes, Enero 5.
Nagtaud ti kaso iti alegasion a ni Poquiz ti maysa a mangidadaulo iti addang a mangpaksiat ken ni Marcos babaen ti naregget a pannakisarsaritana kadagiti aktibo nga opisial ti militar.
Kiddaw ni Duterte a nayon a report ti medical expert, saan a pinatgan ti ICC
Nalagip a rinugian ti CIDG ti nangisayangkat iti imbestigasion kontra iti sumagmamano a high-profile personalities gapu iti alegasion nga isuda ti adda iti likudan ti riribuk iti Manila bayat ti umuna a martsa ti Trillion Peso idi Septiempre 21 itay napan a tawen.
Ni Poquiz, maysa a retirado nga opisial ti Air Force nga addaan iti ranggo a major general, ket nagdalan iti booking procedures kalpasan ti pannakaarestarna ket maekspektar a maipresentar iti korte a nangipaulog iti arrest warrant. Mabal;in ketdi a piansaan ti nasao a kaso.
Binabalaw met dagiti abogado ni Poquiz dagiti polis mainaig iti panangarestarda ngem kinuna ni Nartatez a naobserbar ti legal a proseso bayat ti pannakaipatungpal ti arrest warrant.
"Nagdalan iti legal a proseso aytoy a kaso. Naimbestigaran ti kaso ken dagiti paset ti ebidensia ket naiturong ken naipatulod iti prosekusion, ken nakasarak ti korte iti probable cause," kinuna ni Nartatez.
“Resulta daytoy ti trabaho ti prosecution service ket ita, mabista isuna. Dayta ti proseso, awan ti personal a pakainaiganna,” impaganetgetna.
Kinuna ni Nartatez a ti pannakaarestar ni Poquiz, rumbeng nga agserbi a palagip nga addaan ti pagilian iti maiparbeng a proseso a nasken a masurot iti baet ti alegasion a padpadasen ti grupo da Poquiz a di panangikabkabilangan iti Konstitusion ken panagturay ti linteg. (Aaron Recuenco/Ariel Fernandez/MANILA BULLETIN)
