Saan nga inanamongan dagiti hues ti International Criminal Court (ICC) ti kiddaw ni dati a presidente Rodrigo Duterte a nayon a report ti medical expert, ta kunada a saanen a rumbeng wenno kasapulan iti daytoy a paset ti kaso.
Iti pangngeddeng ti Pre-Trial Chamber I (PTC-I) ti ICC idi Enero 7, inlaksidda iti kiddaw dagiti abogado ni Duterte a nayon a report ti eksperto mainaig iti Article 58(1)(b) ti Rome Statute, a mangsakup iti peggad ti panaglibas, pannakibiang iti proseso, wenno pannakaaramid iti krimen.
Kiniddaw ti depensa iti PTC-I a bilinenda dagiti dinutokanda nga eksperto a mangiruar iti sabali pay a report a mangikeddeng no maibilang met laeng a flight risk ni Duterte maigapu iti agdama a kasasaad daytoy.
Segun iti PTC-I, umdasen dagiti impormasion ken indatag ti tunggal maysa nga agwaywayas a medical expert a dinutokan ti ICC ken ti nagkaykaysa a report-da mainaig iti kasasaad ni Duterte.
Kasapulan ti natibker ken nainkalintegan a pagtaktakderan iti parikut iti WPS --NMC
Kinuna dagiti hues a natungpalen dagiti dinutokanda a medical expert ti annongda a mangsukimat iti medikal a kasasaad ni Duterte mainaig iti kabaelanna a makipaset iti pre-trial proceedings, ket saanen a kasapulan nga agkiddaw pay iti sabali a report.
Impasingked dagiti hues a ti pangngeddeng no adda met laeng pangta ti panaglibas kas sagudayen ti Article 58(1)(b) ket biangen laeng ti PTC-I, ket saanen a kasapulan ti nayon nga ebidensia ti eksperto.
Sinupiat ti Office of the Prosecutor ti kiddaw ni Duterte, ket kinunada nga awan ti nagbaliw kadagiti sirkumstansia a mangikalintegan iti pagkasapulan iti nayon a report ti medical expert.
Segun iti Office of Public Counsel for the Victims, awan ti legal a pagibasaran iti kiddaw ti depensa. (Argyll Cyrus Geducos/Manila Bulletin//Lito Hilidon/Bannawag)
