Pimmusay ni mannurat ti Bannawag Clotilde 'Idding' Cariño Alzate ti Tayum, Abra, itay parbangon iti daytoy nga aldaw, Enero 8, 2026, kas impakaammo ti pamiliana.
Idi laeng Hunio itay napan a tawen a rinambakan ni Tia Id ti maika-100 a panagkasangayna iti sidong dagiti kameng ti pamiliana, kakabagianna, dagiti dati a padana a mannursuro, apostolada (CWL), dagiti dati nga estudiantena, ken adu a gagayyemna.
Nayanak ni Tia Id idi Hunio 3, 1925 iti Tayum. Kaingungot daydi Aureliano ‘Oring’ Alzate, maysa a negosiante ngem nasapa a pimmusay (napaltogan) idi 1970. Naaddaanda iti tallo nga annak.
Nangrugi a nangisuro ni Tia Id kalpasan ti Maikadua a Gubat iti Sangalubongan iti nadumaduma nga eskuela publiko iti Abra. Nagsursurat pay iti Bannawag kadagiti salaysay idi kabambannuaganna. Bayat ti panagisurona iti Tayum Elementary School, nangbuangay iti rondalia. Idi agangay, nagbalin a prinsipal ti pagadalan. Nagprinsipal pay iti Don Marcos Rosales Elementary School iti Patucannay, Tayum. Nagretiro a kas English Supervisor ti Department of Education Culture and Sports (DECS) iti Abra idi 1990.
Camalaniugan-Aparri Bridge, inaguraran ni Marcos
Dagiti tallo nga annak ni Tia Id: inaunaan daydi Marcos a pimmusay idi maladaga. Simmaruno ni Bernardino 'Dando' Alzate, nagpapaay met a District Supervisor iti DECS ken nalatak met a mannurat. Pimmusay iti sakit iti kidney idi 2001. Inulilana ni maestra Perla a kaingungotna ken uppat nga annakda. Ni Agnes ti maikatlo wenno inaudian nga anak ni Tia, dati a mangop-opisina iti DPWH nga idi agangay impamaysanan ti agtagibalay ta addaan met ti 6 nga annak. (Fred Verzosa)
