Dinagadag ni infectious disease expert Dr. Rontgene Solante iti publiko nga agpabakunada koma apaman nga addan ti 2026 formulation kontra iti influenza, kas salaknib iti baro a kita ti “super flu.”
Iti maysa nga interbiu ita nga aldaw, Enero 8, kinuna ni Solante a narangranggas ti “super flu” a kita ti H3N2 nga addaan iti mutasion a mamagbalin iti bakuna para iti influenza iti napan a tawen (2025) a saan unayen nga epektibo. Kas resultana, ad-adu ti tao, nangruna dagiti saan a nabakunaan, ti mabalin a maakaran.
Segun ken ni Solante, manamnama nga addan ti baro a pormula ti bakuna kontra iti inluenza inton Pebrero wenno Marso, ket dinagadagna dagiti nataengan ken dagiti addaan iti sakit nga agpabakunada a dagus apaman a mairuar ti bakuna.
Inlawlawag ni Solante a gagangay a mairuar ti baro a pormula ti bakuna iti tinawen ta tinawen met nga agbaliw ti kita ti virus.
Police general Nicolas Torre III, opisial a nagretiro
Kinuna ni Solante nga uray makarikna iti sintoma dagiti nabakunaan, nababbaba ti posibilidad a mayospitalda no idilig kadagiti saan a nabakunaan.
Binalakadan ni Solante ti publiko a nupay napeggad latta ti super flu, saan a kas iti COVID-19 ti kapigsa daytoy. (Richielyn Canlas/Manila Bulletin//Lito Hilidon/Bannawag)
