Inyebkas ti grupo dagiti mannursuro ita nga aldaw, Enero 8, ti pannakipagriknada iti ipupusay ti maysa a mannursuro iti Siudad ti Muntinlupa, ket inlungalongda ti nadaras a reporma tapno masalakniban dagiti mannursuro iti entero a pagilian.
Iti nagsina a waragawag ti Alliance of Concerned Teachers – Philippines (ACT) ken ti Teachers’ Dignity Coalition (TDC), nagladingitda iti ipupusay ni Agnes Buenaflor, maysa a napinget a mannursuro iti Pedro E. Diaz High School.
Inyebkas ti TDC ti panangraemda ken ni Buenaflor gapu iti dekadan a padasna iti panangiwanwan kadagiti estudiante ken panangpadur-as iti edukasion.
"Daytoy a pannakapukaw ti mangipakita a kasapulan ti polisia a naasi, mangsuporta ken mangidur-as a mangsalaknib iti pagimbagan dagiti mannursuro, propesional a panagtalek, ken dayawda," kuna ti TDC.
Kasapulan ti natibker ken nainkalintegan a pagtaktakderan iti parikut iti WPS --NMC
Impaganetget ti TDC a masapul a marepaso ti polisia ti Department of Education (DepEd) iti classroom observation, nga addaan pakainaigan iti performance rating ti mannursuro, ket kinunada a mangsuportar ken mangpadur-as koma ti panggep daytoy, saan ketdi a mangrukod, ken mangdegdeg iti di kasapulan a pannakaistres dagiti mannursuro.
Innayon ti TDC a dagiti mannursuro, nangruna dagiti nabayagen a mangisursuro, ket inadalda ti propesionda, isu a saan koma a rumbeng a maulit-ulit a paneknekanda ti laingda iti panangisuro.
Ti ipupusay ni Buenaflor ti nangpasged iti panagsasarita mainaig iti kasasaad dagiti mannursuro ken mangipakita a kasapulan a marepormar dagiti polisia tapno masalakniban ti dayaw ken pagimbagan dagiti mannursuro. (Merlina Hernando-Malipot/Manila Bulletin//Lito Hilidon/Bannawag)
