Nagtalinaed nga aktibo ti Bulkan Mayon, segun iti Philippine Institute of Volcanology and Seismology (Phivolcs).
Iti napalabas a 24 nga oras, nakairekord ti Phivolcs iti dua a ginggined a pinarnuay ti bulkan, 72 a panagipugso iti bato, ken 100 a panagyula iti lava ket nagtalinaed a nakabayog ti Alert Level 3.
Maibatay iti paliiw ti Philvocs manipud tengnga ti rabii iti Enero 8 agingga iti rabii ti Enero 9, nagtultuloy ti panagruar ti lava ken bato manipud iti tuktok ti bulkan. Napatak a makita ti bumegbeggang a lava nga agay-ayus manipud iti bunganga ti bulkan, mangipasimudaag nga agtultuloy nga aktibo ti bulkan.
Agrukod iti 195 a tonelada ti sulfur dioxide (SO2) emission iti tunggal aldaw manipud idi Enero 8.
Rep. Barzaga, indarum ni bilionario nga Enrique Razon iti ₱100-milion a cyber libel
Pinasingkedan ti Phivolcs a nagtinnag ti dapo iti Barangay Busay, Daraga, Albay idinto a naireport nga addan dagiti babassit a pakakitaan iti nagtinnag a dapo iti Barangay San Francisco ken Barangay Travesia iti Guinobatan. Madama pay laeng ti panangberberipikarda kadagiti dadduma pay a naapektaran a lugar.
Gapu iti agtultuloy nga Alert Level 3, inyunay-unay ti Phivolcs ti nainget a pannakaiparit ti iseserrek iti 6-kilometer Permanent Danger Zone (PDZ). Imbalakad pay ti ahensia a liklikan ti panagpatayab iti eroplano iti asideg ti bulkan gapu iti peggad a mabalin a parnuayen dapo ken dagiti maipusgo a bato.
Pinalagipanda met dagiti umili ken dagiti local government unit kadagiti mabalin a peggad a mainaig iti agdama a kasasaad ti Bulkan Mayon a pakairamanan dagiti agtinnag a bato, panagreggaay, ken agayus a lahar bayat ti napigsa wenno napaut a tudo.
Indagadag dagiti autoridad kadagiti komunidad nga agtalinaedda a nasiput, surotenda dagiti protocol iti panagbakuit, no kasapulan, ken dagiti laeng opisial a balakad manipud iti Phivolcs ken lokal nga ‘opisina ti didigra’ ti patien.
Merlina Hernando-Malipot/Manila Bulletin
