Pinasingkedan dagiti opisial ti Simbaan ti Quiapo a dua pay a deboto ti natay kabayatan ti libut ti Jesus Nazareno, a nagpaut iti nasurok a 24 nga oras sipud iti pimmanaw daytoy iti Quirino Grandstand iti Luneta idi parbangon ti Biernes (Enero 9).
Agdagupen iti tallo ti bilang ti natay iti Traslacion 2026, a pakairamanan ti maysa a photojournalist a ni Itoh Son, nga agtrabtrabaho iti tabloid a Saksi.
Kiniddaw ni Fr. Ramon Jade Licuanan, rector ti Minor Basilica and National Shrine of Jesus Nazareno (nalatak iti nagan a Quiapo Church), kadagiti deboto nga ikararagda a sapay koma ta saanen a manayonan ti bilang dagiti natay, ken natalgedda a makasubli kadagiti pagtaenganda.
Itay 7:00 iti agsapa (Enero 10), agarup 7,337,700 a deboto ti nakipaset iti Feast of the Black Nazarene ita a tawen, segun iti datos ti Manila Disaster Risk Reduction and Management Office (MDRRMO).
Kasapulan ti natibker ken nainkalintegan a pagtaktakderan iti parikut iti WPS --NMC
Segun ken ni Licuanan, simmardeng ti traslacion iti San Sebastian Church tapno sabten ti Jesus Nazareno ti inana a ni Birhen Maria, kas paset ti tradision a “Dungaw.”
Gapu iti daytoy, nakainana dagiti deboto ken nagboluntario a mangtengngel iti andas (karosa) ti Jesus Nazareno.
Kinuna ni Licuanan a kayatda nga agtalinaed pay laeng koma ti andas iti San Sebastian Church itay agsapa ti Enero 10. Ngem idi nakainana dagiti deboto ken nagboluntario, intuloyda met laeng ti traslacion.
Itay 8:55 iti agsapa (Enero 10), wenno 29 nga oras kalpasan ti panangrugi ti libut, addan ti andas iti Quezon Bridge, iti Carlos Palanca Street ken Hidalgo Street.
Iti sabali a bangir, impalgak ni panakangiwat ti Nazareno 2026 Fr. Robert Arellano nga adda 1,700 a nadangran ken 29 pay a nadangran ti bambantayanda.
Inlawlawag ni Arellano a naginad ti panaggaraw ti libut ita a tawen gapu iti kaadu ti tao a mangbangen iti andas, ken adda dagiti deboto nga impilitda ti umuli iti andas iti laksid ti pakaasida nga awan koma ti umuli iti andas.
Innayon ni Arellano nga adalenda dagiti pasamak ita a tawen, ket daytoy ti pagibasaranda iti aramidenda a panangrambak inton sumaruno a tawen. (Ferdinand Patinio/PNA//Lito Hilidon/Bannawag)
