Agdagup iti 63 a kaso ti “super flu” iti entero a pagilian, segun iti Department of Health (DOH), ket naimbagan aminen dagitoy.
Kinuna ni panakangiwat ti DOH Assistant Secretary Albert Domingo idi Enero 11 a 63 a kaso ti “super flu” ti nailista iti datosda agingga idi Disiembre, idinto nga awan ti natay, no di ket naimbagan ken sibibiagda amin.
Kabayatanna, ur-urayen ti DOH ti kaudian a report no adda pay laeng aktibo a kaso ti super flu iti agdama.
Inlawlawag ni Domingo a saanen a baro ti virus ket saan a rumbeng a pagtaudan ti panagamak ti publiko.
Pannakaipaay iti bayad ti insurance kadagiti naaksidente iti Isabela, papardasen ti LTFRB
Segun ken ni Domingo, ti super flu ket variant ti makunkuna nga Influenza A -- nga am-ammo a kas trangkaso, ket nabayagen nga agrikrikus.
Kinuna ni Domingo a gagangay a tinawen nga agbaliw ti langa ti influenza virus ket saan a naynay a mangpataud iti nakaro a sakit, ket naawagan iti "super flu" gapu iti kinaatiddug ti scientific name daytoy.
Kinuna ni Domingo a ti yaadu ti kaso ti "super flu" ket maiparna iti panagbaliw ti panawen, nangruna iti bulan ti Enero, iti Filipinas.
Innayon pay ni Domingo a boluntario laeng ti panangusar ti tao iti face mask. (Jel Santos/Manila Bulletin//Lito Hilidon/Bannawag)
