Pinalagipan ti local government unit (LGU) ti Piddig, Ilocos Norte ti publiko a saan pay a naluktan ti Mount Lammin kadagiti bisita wenno turista, kas nasakbay a panagannad iti itataud ti uram iti bantay.
Iti maysa a pakdaar a naispakil iti social media ita nga aldaw, Enero 12, kinuna ni mayor ti Piddig Georgina Guillen a nakaserra latta ti Mount Lammin tapno maliklikan ti mapataud nga uram iti bantay a mabalin a mangdadael iti bantay, ken mangapektar iti kinatalged ti biag dagiti ayup ken ti lokal a komunidad.
Saan pay a nawaswas ti ordinansa a naipaulog idi pay Enero 13, 2025.
Masarakan kadagiti barangay ti Estancia ken Dupitac, makaallukoy ti Mount Lammin kadagiti agkabannuag nga adbenturista gapu iti kalamiis ti panawen iti bantay ken ti napintas a kalsada a mangitunda iti plantasion ti kape iti bantay, a maysa a proyekto ti Ilocos Region.
TAO, LUGAR, PASAMAK: Sadiay Salomague
Segun kadagiti autoridad, aklonen ti Bureau of Fire Protection a limitado laeng ti kabaelanda a mangpaksiat iti uram iti bantay, a namrayan dagiti LGU iti lugar a mangipasdek iti wagas tapno maliklikan ti uram.
Iti laksid daytoy a pammilin, napaliiw dagiti autoridad nga iti kallabes nga atiddog a bakasion, adu latta ti nagpasiar iti bantay ken nangibatida kadagiit basura, agraman kadagiti plastik a botelia ken food container, idinto a dagiti dadduma ket nagpatnagda a nag-camping.
Inyebkas dagiti kameng ti Municipal Environment and Natural Resources Office ken ti Office of the Municipal Agriculturist ti pannakaupayda kalpasan nga inikkatda dagiti rugit nga imbati dagiti iresponsable nga agpaspasiar.
Impaganetget dagiti opisial nga agtalinaed ti checkpoint tapno naan-anay a mabantayanda dagiti mapan iti bantay ken agtalinaed daytoy a nadalus ken maliklikan ti uram. (Leilanie Adriano/PNA//Lito Hilidon/Bannawag)
