Impaganetget dagiti abogado ni dati a presidente Rodrigo Duterte iti International Criminal Court (ICC) a kimmaro ti kasaad ti bagi ken panunot ni Duterte, ket masapul nga amirisenda ti agtultuloy a pannakaidetenar daytoy.
Iti dokumento nga impila ni Nicholas Kaufman, abogado ni Duterte, idi Enero 9, kinunana a napukawen ti pigsa, nakapuy, ken awanen ti kabaelanna nga agtignay, maibasar iti inaldaw a paliiw ti pamilia ken abogadona.
Segun iti depensa, ti panaglabas ti panawen ti nangpakaro iti kasasaad ti salun-at ni Duterte, ket dinakamatna ti kinuna dagiti eksperto a dinutokan ti ICC a "lakayen, nakapuy, ken rumaprapisen ni Duterte."
Innayon ni depensa a saan a makagunay ni Duterte a bukbukodna.
Kasapulan ti natibker ken nainkalintegan a pagtaktakderan iti parikut iti WPS --NMC
Nupay ti kiddawda ket saan a mangikeddeng iti kinainosente wenno panagbasol ni Duterte, impaganetget ni Kaufman a maaramid koma ti periodic review ti pannakaditenarna, kas sagudayen ti Article 60(3) ti Rome Statute, segun iti panagbalblaiw ti salun-atna.
Kinuna ni Kaufman a saanen a kabaelan ni Duterte nga aramiden ti panaglibas idinto a saannan a kabaelan ti aggaraw a bukbukodna, agplano, agdesision, agtignay iti nabayag, ken ti panangliklik iti panangimaton.
Innayon ni Kaufman a saanen a nagparparang ni Duterte iti korte iti las-ud ti 10 a bulan ket kinunana a paset ti panangannurot iti due process ti panangsukimat ti depensa kadagiti parikut iti kasasaad ti panunot ni Duterte, a buyogen ti gundaway ti depensa nga ilawlawag daytoy iti korte.
Iti sabali a bangir, sinupiat ti Office of the Prosecutor ti immuna a kiddaw ti depensa mainaig iti pannakaiditenar ni Duterte, ket impaganetgetda nga adda latta dagiti statutory risk factor.
Awan pay ti pangngeddeng ti Pre-Trial Chamber iti indatag ni Kaufman idi Enero 9. (Argyll Cyrus Geducos/Manila Bulletin//Lito Hilidon/Bannawag)
