Dinutokan ni Presidente Marcos Jr. da Executive Secretary Ralph Recto, Agrarian Reform Secretary Conrado Estrella III, ken Social Welfare and Development Secretary Rex Gatchalian a mangaywan iti gobierno bayat ti kaaddana iti United Arab Emirates (UAE).
Daytoy ti impalgak ni Undersecretary ti Presidential Communications Office (PCO) Claire Castro bayat ti panagbiahe ti presidente ita nga aldaw, Enero 12, para iti isasarungkarna iti UAE agingga inton Enero 14.
Sipud idi Oktubre 2024, italtalek ni Marcos ti panangakem iti maysa nga executive committee a buklen dagiti opisial ti gabinete a masansan nga idauluan ni Estrella ken ti executive secretary, no kasta a mapan iti sabali a pagilian.
Segun ken ni Castro, saan a mangted ti presidente iti departure statement iti panagbiahena iti UAE.
Committee on Justice ti Kamara, kabaelanda a tamingen ti dua nga impeachment complaint
Makipaset ti presidente iti Abu Dhabi Sustainability Week a maangay manipud Enero 11 agingga 15, a panagtataripnong dagiti dadaulo ti gobierno, negosio, ken kagimongan tapno pagsasaritaanda dagiti rumbeng nga aramiden iti pannakaitandudo ti sangalubongan a kinatalged.
Manamnama a pirmaan ni Marcos ti dua a tulag iti UAE -- ti Comprehensive Economic Partnership Agreement (CEPA) ken ti Memorandum of Understanding on Defense Cooperation.
Simmarungkar ni Marcos iti UAE gapu iti awis ni UAE President Sheikh Mohamed bin Zayed Al Nahyan. (Betheena Unite/Manila Bulletin//Lito Hilidon/Bannawag)
