Inkeddeng ti Senate Blue Ribbon Committee a maituloy inton Enero 19 ti panagimbestigarda kadagiti anomalia ti flood control project ti gobierno, segun ken ni Senate President Pro Tempore Panfilo “Ping” Lacson.
Iti maysa nga interbiu idi Enero 11, kinuna ni Lacson a paayabanda manen dagiti tao a saan a dimmar-ay iti hearing: da dati a DPWH Secretary Manuel Bonoan, dati nga undersecretary Trygve Olaivar, ken Meynard Ngu, ken ni dati a Rep. Elizaldy “Zaldy” Co.
No saanda latta a dumar-ay, kuna ni Lacson nga irekomendarna iti Senate President a maipaulog ti warrant of arrest kadakuada.
Kinuna ni Lacson, daulo ti Blue Ribbon Committee, a kayatna a lawlawagen ti Department of Budget and Management (DBM) ken ti Office of the Executive Secretary no kasano a nairuar ti Special Allotment Release Order (SARO) idi Disiembre 27, 2024 a nangipalubos iti pannakairuar ti ₱50 a bilion manipud iti unprogrammed appropriations (UA) iti nailian a badiet.
Kasapulan ti natibker ken nainkalintegan a pagtaktakderan iti parikut iti WPS --NMC
Maysa kadagiti posible nga awisen ti komite ni Rep. Leandro Legarda-Leviste, babaen ti liderato ti Kamara, no anamongan ni Leviste. Ni Leviste ti nagkuna nga adda naawatna a dokumento manipud ken ni dati a Department of Public Works and Highways (DPWH) undersecretary Maria Catalina Cabral, a mapapati a naglaon iti listaan dagiti proyekto ken pondo a nailatang kadagiti nadumaduma a distrito iti nabaetan ti 2023 ken 2026, nga am-mmo itan a “Cabral files.”
Segun ken ni Lacson, adda nagpadaan ti dokumento nga inruar ni Leviste ken ti dokumento nga imetna, ngem kayatna a makita ti "SAP" ken "OP" a dinakamat ni Leviste.
Innayon ni Lacson a rumbeng a patalgedan pay nga umuna ti DPWH ti makunkuna a “Cabral files” sakbay nga agbalin a pagibasaran iti pannakaidarum dagiti nairaman a kameng ti gabinete. (Hannah L. Torregoza/Manila Bulletin//Lito Hilidon/Bannawag)
