Agsusungani ti iparparang ti defense team ken pamilia ni dati a presidente Rodrigo Duterte mainaig iti kasasaad ti salun-at daytoy, bayat nga ad-adalen ti International Criminal Court (ICC) ti agtultuloy a pannakaiditenarna.
Iti dokumento nga indatag ti abogado ni Duterte a ni Nicholas Kaufman iti ICC idi Enero 9, kunana a kimmaro ti panagkapuy ti bagi ken panunot ni Duterte ket masapul a repasuen ti ICC ti pannakaiditenarna.
Segun ken ni Kaufman, saanen a kabaelan ni Duterte ti aglibas, agpangta kadagiti testigo, ken agaramid iti krimen gapu ta saannan a kabaelan ti agtignay a bukbukodna.
Kiniddaw ni Kaufman iti Pre-Trial Chamber nga ipaayda ti interim release ni Duterte, idinto nga immanamongen ti maysa a pagilian a kameng ti ICC a mangpasangbay kenkuana iti sidong ti nainget a kondision.
Kasapulan ti natibker ken nainkalintegan a pagtaktakderan iti parikut iti WPS --NMC
Ngem kasungani ti ibagbaga ti anak ni Duterte a ni Davao City Rep. Paolo Duterte iti pananginterbiu kenkuana ni vlogger nga Alvin & Tourism iti The Netherlands.
"Okey met isuna. Mangmangan. Limmukmeg pay bassit," kinuna ni Rep. Duterte.
Impaganetget ni Rep. Duterte a matartaripato a naimbag ti amana iti uneg ti detention facility.
Naipaskil ti video ti interbiu iti Facebook page ni Alvin & Tourism idi Enero 10, maysa nga aldaw kalpasan ti panangidatag ni Kaufman iti ICC.
Awan pay ti pangngeddeng ti ICC iti impila ti depensa idi Enero 9. (Argyll Cyrus Geducos/Manila Bulletin//Lito Hilidon/Bannawag)
