Sinupiat ti Filipinas ti ibagbaga ti China nga isu ti mangpatpataud iti riri iti West Philippine Sea (WPS) gapu iti pannakaisaad dagiti bapor ken panangpalubos kadagiti Filipino a mapan agkalap sadiay.
Iti statement ti National Maritime Council (NMC) idi Enero 12, kinunada a saan a nainkalintegan, ken inuulbod, daytoy a sasawen ti China.
Impaganetget ti NMC a nainkalintegan ti panagkalap dagiti Filipino a mangngalap iti ikub ti maritime zone ti Filipinas, idinto a pagrebbengan ti Estado a salakniban ida, ket saan daytoy a maibilang a panangkarit wenno pannakiriri.
Kinuna ti NMC a ti riri iti WPS ket ti direkta a resulta ti agultultoy nga illegal, agresibo, ken manangallilaw a tignay ti China iti baybay a kukua ti Filipinas.
Kasapulan ti natibker ken nainkalintegan a pagtaktakderan iti parikut iti WPS --NMC
Inlawlawag ti NMC nga isaysayangkat ti Filipinas iti operasion iti WPS tapno laeng masalakniban ti kinatalged ti baybay, mangipaay iti tulong para iti tattao, ken mangipatungpal iti linteg, kas maitunos iti internasional a linteg, nangruna iti UNCLOS (United Nations Convention on the Law of the Sea) ken iti 2016 Arbitral Award.
Dinagadag ti NMC ti China a raemenda koma dagiti nadakamat nga internasional a paglintegan tapno agtalinaed a natalged iti rehion. (Betheena Unite/Manila Bulletin//Lito Hilidon/Bannawag)
