Mapan a 186,628 a turista ti pimmasiar iti San Nicolas, Pangasinan idi 2025, namindua iti bilang dagiti turista idi 2024 a 90,726, segun iti San Nicolas Tourism Office idi Enero 12.
Segun ken ni Tourism Officer Marc Angelu Victor a ti yaadu ti bilang dagiti turista ket gapu iti pannakapasayaat dagiti pasilidad ken lugar a pagpasiaran, nga insayangkat ti gobierno lokal, kasta met ti pannakaitampokda iti video dagiti vlogger ken content creator iti entero a pagilian.
Innayon ni Victor a dakkel met ti naitulong ti napasayaat a kalsada iti yaaadu dagiti turista, ti panaglukat ti kalsada a mamagsilpo iti Pangasinan ken Cagayan Valley.
Ti Villaverde Road iti Barangay Malico ti nagpaay a kangrunaan a pagserkan iti Nueva Vizcaya ken kadagiti kabangibang a probinsia.
Kasapulan ti natibker ken nainkalintegan a pagtaktakderan iti parikut iti WPS --NMC
Ti Malico ti naaddaan iti kaaduan a sangaili (97,932), a sarunuen ti Agpay Eco Park (49,058) ken Puyao Picnic Grounds (39,638).
Ti Malico, a limmatak gapu iti nalamiis a puon a maipadis iti Baguio City ken Benguet, ti indeklarar ti gobierno probinsia idi 2023 a kas “summer capital of Pangasinan."
Nalasbang a kayo, natural a ban-aw ken duogan a rangtay a naipatakder idi 1969 ti itampok ti Agpay Eco Park.
Adu met agpasiar iti Puyao Picnic Grounds, maysa a seasonal a pagpasiaran a nalatak iti panawen ti kalgaw, gapu iti karayan.
Madama a matartarimaan ti Puyao gapu iti pannakadadael nga inyeg dagiti didigra idi napan a tawen, ngem kinuna ni Victor a manamnama a malpasen daytoy sakbay ti atiddog a panawen ti bakasion iti umuna a paset ti tawen. (Hilda Austria/PNA//Lito Hilidon/Bannawag)
