Nangipaulog ti Laguna Regional Trial Court (RTC) Branch 26 iti Santa Cruz, Laguna iti arrest warrant kontra ken ni negosiante Charlie “Atong” Ang gapu iti mapapati a pannakairamanna iti pannakapukpukaw dagiti pinulpullo a sabungeros wenno mammallot.
Maidarum ni Ang iti kaso a kidnapping with homicide ken kidnapping iti saklang ti tallo a Regional Trial Court, iti Lipa City, Batangas; iti Santa Cruz ken San Pablo City, Laguna.
Saan a mapiansaan dagiti darum.
Iti arrest warrant nga inruar ni presiding Judge Mary Jean Cajandab-Ong a napetsaan iti Enero 13, 2026, mabilbilin dagiti maseknan (nga agarestar) a pannakabagi ti linteg nga agusar iti uray maysa laeng a body-worn camera ken maysa nga alternatibo a recording device segun iti Rules on the Use of Body-Worn Cameras in the Execution of Warrants nga inruar ti Korte Suprema.
Umuna nga impeachment complaint kontra ken ni Marcos, naidatag iti Kamara
Nagtaud dagiti kaso kontra ken ni Ang gapu iti misterioso a panagpukaw idi 2022 ti sumagmamano a mammallot ken naluktan manen iti publiko idi 2025 kalpasan ti panagparang ti whistleblower a ni Julie "Dondon" Patidongan, a pagaammo pay kas Totoy, a nangibaga nga ammona no sadino ti nakaibellengan dagiti bangkay dagiti mammallot iti Taal Lake.
Kinunana nga umabot iti 100 a tattao ti napapatay gapu iti mapapati a pannakairamanda iti match-fixing.
Intudo ni Patidongan ni Ang, a dati nga amona, a kas ti mastermind iti likudan dagiti panagpukaw. Inlibak met ni Ang dagiti pammabasol. (Danny Estacio/MANILA BULLETIN)
