Nangipila ti bilionario a ni Enrique K. Razon Jr. iti cyber libel complaint kontra ken ni Cavite Rep. Francisco “Kiko” Barzaga, a kunana nga inusar ti kongresman ti social media tapno iwayatna ti kampania ti pammerperdi nga iramramanna ti casino ken ports tycoon iti panagpasuksok iti Kongreso.
Dua a kaso ti cyber libel ti impila ni Razon iti babaen ti Cybercrime Prevention Act. Kidkiddawen met ti negosiante ti ₱100 a milion a moral damages ken ₱10 a milion nga exemplary damages, a dinakamatna ti dakkel a pannakadangran ti nainsangalubongan a reputasionna ken emosional a pannakariribukna.
Ti reklamo, a naipila ita a Mierkoles, Enero 14, iti Makati City Prosecutor’s Office, ket naisentro kadagiti paskil iti Facebook idi Enero 9 a mapapati a pangibagbagaan ni Barzaga a ni Razon ti “mastermind behind the corruption in Congress.”
Kasapulan ti natibker ken nainkalintegan a pagtaktakderan iti parikut iti WPS --NMC
Kinuna ni Barzaga a pinasuksokan ni Razon dagiti kameng ti National Unity Party (NUP) bayat dagiti panagtitipon iti Solaire Resort & Casino tapno mapatibker ti suporta para ken ni dati nga Speaker Martin Romualdez sakbay ti 2025 elections.
Inlibak ni Razon, chairman ti International Container Terminal Services Inc. ken Bloomberry Resorts Corp., dagiti alegasion a kas naan-anay a parparbo ken naaramid a buyogen ti “reckless disregard for the truth.”
Agdama nga adda iti babaen ti 60-day suspension ni Barzaga iti Kamara kalpasan ti ethics investigation iti panangusarna iti social media nga agipaskil iti naaalas ken pakaibabainan a content.
Segun iti affidavit ni Razon, rinibu a users ti Facebook ti nakabasa kadagiti paskil ni Barzaga ken pinakaro pay dagiti local news outlet sakbay a na-delete dagitoy a paskil. Intudo ni Razon ti pannakausar ti hashtag nga “#IkulongSiRazon” a kas ebidensia ti malicius intent.
Kinuna pay ni Razon a saan a nakakappapati ti akusasasion a panagpasuksok ta awan met ti kalaban ni Romualdez idi ket nakagun-od daytoy iti supermajority (a botos) para iti speakership. Impaganetget ni Razon nga awan ti pannakairamanna iti internal leadership dynamics ti lehislatura.
Ad-adalenen dagiti piskal ti Makati dagiti ebidensia tapno maammuan no addaan probable cause tapno maidatag ti kaso iti korte. (Manila Bulletin Newsroom/James A. Loyola)
