Pinakdaaran ti Bureau of Immigration (BI) ti publiko kontra kadagiti agraraira nga online love scam a mangusar iti nagan ti ahensia a pangallilaw kadagiti biktimada.
Iti waragawag ti BI, binalakadanda ti publiko nga agridam no kasta nga adda kalanglangenda iti online, aglalo kadagiti agkunkuna a nangipaw-it iti package sa agkiddaw iti kuarta a pagbayad iti gobierno.
Imbilin ti BI a beripikaren a dagus dagiti mapagduaduaan nga email wenno online message ken liklikan ti mangted iti kuarta wenno personal nga impormasion.
Impalgak ti BI daytoy a pakdaar kalpasan nga immasideg kadakuada ti maysa a babai a nagpatulong tapno pasingkedanna no agpayso ti email nga ipagarupna a naggapu iti maysa nga opisial ti BI mainaig iti pannakaideliber ti parcel nga aggapu iti abroad.
Zaldy Co, saan a maikkan iti judicial relief --Sandiganbayan
Segun iti BI, palso ti nasao nga email ken paset daytoy ti wagas ti romance wenno love scam, idinto a saanda a trabaho ti mangsabet kadagiti parcel, mangideliber wenno agsingir iti bayad para iti pannakairuar ti parcel.
Inlawlawag ti BI a ti trabahoda ket agpatingga laeng iti panangkontrol iti imigrasion ken panangbantay iti nagbedngan, saan a karaman ti panangideliber kadagiti parcel. (Jeffrey Damicog/Manila Bulletin//Lito Hilidon/Bannawag)
