Kiddawen ni Presidente Marcos Jr. ti ekstradision ni dati a Rep. Zaldy Co a patienna nga adda ita sadi Portugal.
Impalgak ni sekretario ti Department of the Interior and Local Government (DILG) Jonvic Remulla idi Enero 13 a panggep ni Marcos a mangbukel iti extradition treaty iti Portugal tapno maarestar ni Co iti maipagarup a pannakairamanna kadagiti anomalia dagiti flood control project.
Segun ken ni Remulla nangted iti pammilin ti presidente a pormal nga agaplikardan iti extradition treaty iti Portugal nupay awan pay ti pormal nga extradition treaty iti nagbaetan dagiti dua a pagilian.
Kinuna ni Remulla a nagkiddawdan iti Interpol para iti pannakapasubli ni Co iti Filipinas, no pudno nga adda daytoy iti Portugal.
Inlawlawag ni Remulla a maysa laeng daytoy kadagiti mabalin a pamuspusan tapno mapasubli ni Co iti Filipinas, ket ad-adalenda pay ti dadduma a pamuspusan kas iti Interpol ken ti United Nations, ta mabalin nga agbayag ti pannakaanamong ti extradition treaty.
Awan ti CCTV footage ti OSAA, Marines iti pinnaltogan iti Senado -- Aplasca
Idi Disiembre 2025, kinanselar ti gobierno ti Filipinas ti pasaporte ni Co, tapno saan daytoy a makalemmeng iti dadduma a pagilian, ngem atapenda nga adda Portuguese passport ni Co, isu a mabalin nga adda iti Portugal daytoy.
Ni Co ti maysa kadagiti 16 a naidarum gapu iti naanomalia a flood control project iti Oriental Mindoro. (Betheena Unite/Manila Bulletin//Lito Hilidon/Bannawag)
