Pimmigsa bassit ni Tropical Depression "Ada" ita nga aldaw, Enero 15, bayat ti panangtuparna iti Philippine Sea iti daya ti Mindanao, segun iti Philippine Atmospheric, Geophysical and Astronomical Services Administration (PAGASA).
Naipan ti 11 a lugar iti Tropical Cyclone Wind Signal No. (TCWS) 1 a pakairamanan ti Sorsogon, ti abagatan a daya a paset ti Albay (Rapu-Rapu, Manito, ken Legazpi City), Northern Samar, Samar, Eastern Samar, daya a paset ti Biliran (Maripipi, Kawayan, Culaba, Caibiran, ken Cabucgayan), daya a paset ti Leyte (Carigara, Barugo, San Miguel, Babatngon, Tacloban City, Tunga, Jaro, Alangalang, Santa Fe, Palo, Dagami, Pastrana, Tanauan, Tabontabon, Julita, Dulag, Tolosa, La Paz, Mayorga, MacArthur, Javier, Abuyog, ken Mahaplag), daya a paset ti Southern Leyte (Silago, Sogod, Libagon, Saint Bernard, Hinunangan, Hinundayan, Anahawan, San Juan, Liloan, San Ricardo, San Francisco, ken Pintuyan), Dinagat Islands, Surigao del Norte, ken Surigao del Sur.
Kinuna ti PAGASA nga agingga iti TCWS No. 2 ti mabalin a maipakdaar iti panaglabas ni Ada iti pagilian.
Itay 5:00 iti parbangon, nasaripatpatan ti sentro ni Ada iti agarup 385 a kilometro iti daya-amianan a daya ti Hinatuan, Surigao del Sur, wenno 465 a kilometro iti daya ti Surigao City, Surigao del Norte.
Kasapulan ti natibker ken nainkalintegan a pagtaktakderan iti parikut iti WPS --NMC
Agpalaud ni Ada iti kapardas a 20 a kilometro kada oras, ken agpigsa iti 55 a kilometro kada oras iti asideg ti sentrona ken pugso nga agingga iti 70 a kilometro kada oras.
Posible nga agbalin a tropical storm ni Ada ita nga aldaw, ken agtuloy a pumigsa bayat ti ilalabasna iti Philippine Sea.
Pattapattaen ti PAGASA nga agpaamianan a laud ni Ada agingga inton Domingo, Enero 18, sakbay nga agpaamianan-amianan a laud inton Lunes, Enero 19. (Ellalyn De Vera-Ruiz/Manila Bulletin//Lito Hilidon/Bannawag)
