Nasakbay unay ken saan a legal.
Kastoy nga inladawan ti abogado ni Charlie “Atong” Ang ti naipaulog a warrant of arrest kontra iti klientena mainaig iti kaso dagiti mapukpukaw a mammallot (sabungeros).
Segun ken ni Atty. Gabriel Villareal, saan a natungpal ti korte ti Santa Cruz, Laguna dagiti alagaden ti linteg a masapul a naipaay koma ken ni Atong Ang.
Kuna ni Villareal a nagtignay laeng ti korte iti saan a kompleto nga impormasion manipud iti Department of Justice (DOJ) iti panangtingitingna iti probable cause, nga awan ti counter-affidavit ken ebidensia dagiti respondent a pakairamanan ni Ang.
Kasapulan ti natibker ken nainkalintegan a pagtaktakderan iti parikut iti WPS --NMC
Naipaulog ti warrant of arrest a maibusor ken Atong Ang gapu kadagiti kaso a kidnapping with homicide ken kidnapping with serious illegal detention, segun iti Criminal Investigation and Detection Group (CIDG).
Naarestaren dagiti 18 a naidarum iti dua nga arrest warrant, malaksid ken ni Ang.
Ngem kinuna ni Villareal a mailabsing iti kalintegan ni Ang ti pannakaipaulog ti arrest warrant ken mabalin a nalabsing ti linteg, maibasar iti Konstitusion ken iti kaso a dinesisionan ti Korte Suprema.
Kinuna ni Villareal nga aramidenda amin a legal a pamuspusan tapno maikkan ni Ang iti gundaway a mangkuestionar iti arrest warrant kontra kenkuana.
Impasigurado ni Villareal iti publiko a raemen ni Ang ti autoridad ti korte ken paiturayan daytoy iti proseso ti linteg. (Aaron Recuenco/Manila Bulletin//Lito Hilidon/Bannawag)
