Imbutaktak ni Senate President Pro Tempore Panfilo "Ping" Lacson, idi Enero 14, nga inggagara ni dati a sekretario ti Department of Public Works and Highways (DPWH) Manuel Bonoan nga ikkan iti palso a datos ti Malakanyang mainaig kadagiti flood control project, a mabalin a tapno saan a maimbestigaran dagitoy.
Iti naangay a Kapihan sa Senado media briefing, dinakamat ni Lacson ti mapagtalkan unay nga impormasion a dimmanon kenkuana a mangipakpakita iti datos a mangitunda iti biddut a grid coordinates dagiti rinibu a flood control project iti entero a pagilian.
Segun ken ni Lacson, palso dagiti insubmiter ni Bonoan iti Malakanyang a grid coordinates dagiti flood control project iti pagilian, a paset ti Sumbong sa Pangulo website.
Kuna ni Lacson a nagbanag daytoy iti saan nga umno a datos kadagiti 421 a ghost project a nalpasen nga ininspeksion ti DPWH, ket at-aturenda ita babaen ti panangidiligda kadagiti rekordda kas iti multi-year planning and scheduling (MYPS), Project and Contract Management Application (PCMA), ken dadduma pay a dokumento a natalged nga imet ti DPWH.
Kasapulan ti natibker ken nainkalintegan a pagtaktakderan iti parikut iti WPS --NMC
"Uray ipilitnana a saan nga isu ti kangrunaan a nakabasol, nalawag a makitatayo ti pannakapasetna iti panangkalub iti krimen," kuna ni Lacson.
Kuna ni Lacson nga inranta ni Bonoan daytoy tapno kumapuy ken madadael ti pannakaimbestigar dagiti flood control project, ta no palso dagiti impormasion mainaig kadagiti flood control project a linaon ti Sumbong Sa Pangulo website, panunoten ti tao a saan a mapagtalkan daytoy.
Innayon ni Lacson a daytoy ti maysa kadagiti palutpotenda iti pannakaituloy ti imbestigasion ti Senate Blue Ribbon Committee nga idadauluanna, inton Enero 19, babaen ti panangipaulogda iti subpoena kadagiti dokumento a nabati ni dati nga Undersecretary Catalina Cabral sakbay a pimmusay. (Dhel Nazario/Manila Bulletin//Lito Hilidon/Bannawag)
