Ididiaya ti Department of the Interior and Local Government (DILG) ti ₱10 a milion a gunggona para iti asino man a makaipaay iti impormasion a mangitunda iti pannakaarestar ni Charlie “Atong” Ang, nga isu laengen ti di pay nakemmeg a suspek iti kaso dagiti mapukpukaw a mammallot (sabungeros).
Imbilin ni Sekretario ti DILG Juanito Victor “Jonvic’’ Remulla kadagiti polis nga ekspektarenda ti posible a saan a nasayaat a mapasamak iti panangsawarda ken ni Ang, nga inladawanda nga "armado ken napeggad."
Natiliwen dagiti 18 a tattao nga impaarestar ti maysa a korte iti Laguna gapu iti kaso a kidnapping with homicide ken kidnapping with serious illegal detention, malaksid ken ni Ang.
Lima a kaso ti kidnapping with homicide ken innem a kaso ti kidnapping with serious illegal detention ti sanguen ni Ang.
Kasapulan ti natibker ken nainkalintegan a pagtaktakderan iti parikut iti WPS --NMC
Inlawlawag ni Remulla nga addaan ni Ang iti 20 a guardia a sumursurot sadino man ti papananna, isu nga imbilangda nga armado ken napeggad ni Ang.
Itay kallabes, kinuna ti Philippine National Police (PNP) a binaondan ti kanayonan a tracker team ken kameng ti intelligence tapno sapulenda ni Ang.
Segun ken ni Remulla, aramiden ti PNP ti amin a kabaelanda tapno maarestar ni Ang, uray nabaknang ken naimpluensia a tao daytoy.
Indagadag ni acting PNP chief Lt. Gen. Jose Melencio C. Nartatez, Jr. a sumukon ni Ang ket saanen nga aglemmeng kadagiti polis. (Chito Chavez/Manila Bulletin//Lito Hilidon/Bannawag)
