Aw-awisen ti Office of the Prosecution ti International Criminal Court (ICC) dagiti direkta a testigo bayat ti panagimbestigarda iti mapapati a crimes against humanity mainaig iti war on drugs a naaramid iti Filipinas idi panawen ni dati a presidente Rodrigo Duterte.
Iti maysa a paskil iti Facebook idi Enero 15, nairaman iti im-imbestigarenda dagiti maipagarup a pammapatay, panangdangran, ken seksual a panangranggas a nainaig kadagiti naiwayat nga anti-drug operation.
Gapu iti daytoy, nagapelar ti Office of the Prosecution kadagiti direkta a testigo nga umasidegda ken makiumanda kadagiti imbestigador ti ICC. Mairaman iti apelar dagiti kameng ti polisia a nakipaset kadagiti maim-imbestigaran a paspasamak.
Im-imbestigaren ti ICC dagiti napasamak iti nagbaetan ti Nobiembre 2011 ken Marso 2019. (Argyll Cyrus Geducos/Manila Bulletin//Lito Hilidon/Bannawag)
