Manamnama a makissayan ti bayadan dagiti pasiente a Filipino gapu iti naanamongan a pondo ti Department of Health (DOH) iti 2026 national budget, a kangatuan a badiet ti sektor iti sidong ti administrasion ni Presidente Ferdinand R. Marcos Jr.
Segun ken ni assistant secretary ti DOH Albert Domingo, idi Enero 16, mapan a ₱448 a bilion ti dagup ti badiet ti sektor ti salun-at, agraman ti agpaay iti Philippine Health Insurance Corporation (PhilHealth), a dandani madanonnan ti ₱450 a bilion a lebel ti tinawen a pondo a napattapatta tapno maipatungpal ti Universal Health Care (UHC) law.
Kinuna ni Domingo a ₱129 a bilion ti pondo a maala ti PhilHealth iti 2026, agraman ti ₱60 a bilion nga imbilin ti Korte Suprema a maisubli, tapno mabaelan ti PhilHealth a pasayaaten dagiti benepisio ken mangibaklay iti dakdakkel a paset ti gastos iti ospital.
Inlawlawag ni Domingo a no dakdakkel ti bayadan ti gobierno, basbassit ti ibaklay ti pasiente.
Kasapulan ti natibker ken nainkalintegan a pagtaktakderan iti parikut iti WPS --NMC
Innayon ni Domingo nga agtultuloy ti pannakaisaknap ti zero balance billing iti ward wenno basic accommodation kadagiti ospital ti DOH.
Iti agdama, ibaklay ti PHilHealth ti 14 agingga 15 a porsiento ti babayadan iti ospital, ngem tarigagayanda nga ingato daytoy iti 25 agingga 30 a porsiento, nangruna kadagiti marigrigat a sektor.
Maibasar iti UHC, masapul a mangipaay dagiti pribado nga ospital iti 10 a porsiento kadagiti pagiddaanda para kadagiti pasiente ti UHC, idinto nga agtalinaed ti zero balance billing kadagiti ospital ti DOH. (Ma. Teresa Montemayor/PNA//Lito Hilidon/Bannawag)
