No ti pannaka-impeach ni Presidente Marcos Jr. ti pagsasaritaan, awan ti mabalin a gapu wenno rason, segun iti National Unity Party (NUP).
Daytoy ti imbaga ni NUP Chairman Antipolo City 1st district Rep. Ronaldo Puno iti virtual press conference idi Biernes, Enero 16, idi masaludsod maipapan iti maipadpadamag nga adda maipila nga impeachment complaint kontra iti presidente iti maika-20 a Kongreso.
"Kinapudnona, awan makitak a rason tapno maipila ti impeachment case kontra iti presidente. Isu a kayatko a kitaen ti ania man a complaint no adda man," kinuna ni Puno.
Segun ken ni Puno, padpadasenda a panunoten no ania dagiti rason a maipan iti impeachment case, kas koma no adda kadi culpable violation iti Konstitusion, ngem awan met ti makitada.
Pannakaipaay iti bayad ti insurance kadagiti naaksidente iti Isabela, papardasen ti LTFRB
Mangrugi ti proseso ti impeachment iti Kamara. Masapul nga umisu a maipila ti complaint, sa kalpasanna, yendorso ti uray maysa laeng a kameng ti Kamara sakbay nga ikonsiderar daytoy ti sibubukel a Kamara.
Iti babaen ti normal a proseso, maiturong ti reklamo iti Committee on Justice. Kalpasanna, mangangay ti panel kadagiti hearing tapno maikeddeng no addaan umdas a form ken substance ti complaint.
Kinuna ni Puno a ti Kamara--wenno uray ti majority bloc laeng a nakaikamenganna ken dagiti dadduma pay a kameng ti NUP--saanda a suportaran ti impeachment complaint.
"Nalawag a saan (dimi suportaran dayta)," kinuna ti chairman ti maikadua a kadakkelan a partido politikal iti Kamara no iti kaadu ti kamengna. (Ellson Quismorio/MANILA BULLETIN)
