Nagluto iti pinakbet dagiti umili ti Villasis, Pangasinan kas panangrambakda iti Talong Festival a naangay idi Enero 16.
Duapulo ket maysa a barangay ti nakipaset iti panagluto iti pinakbet, a ti tarong a ramenna ket kangrunaan a produkto ti Barangay Pias, San Blas, ken Caramutan.
Nasurok a 1.1 a tonelada ti nateng a pinakebbetda iti siliasi, nga agbalor iti agarup ₱118,000. Agdagsen iti 56 a kilo ti sangasiliasi a pinakbet.
Addaan ti Villasis iti 80 agingga 100 nga ektaria a daga a pakaimulmulaan ti tarong, nga imulmula ti aganay a 700 a mannalon.
Kasapulan ti natibker ken nainkalintegan a pagtaktakderan iti parikut iti WPS --NMC
Segun ken ni Municipal Agriculturist Dionisio Cariño, produkto ti ili dagiti amin a tarong a nausar iti festival, a pammaneknek iti kabaelanda iti agrikultura ken kinatalged ti suplay ti taraon.
Impasingked ni Mayor Dita Abrenica ti panagkumit ti gobierno munisipal a mangsuportar kadagiti mannalon, idinto a ti agrikultura ti kangatuan a prioridad ti administrasion.
Inkari ti mayor nga agtultuloy ti panangtulongda kadagiti mannalon, agraman iti pannakaipasdek ti solar irrigation system, pondo para kadagiti abono, pondo para kadagiti traktor, ken pannakaiwaras dagiti traktor kadagiti barangay tapno mapasayaat pay ti apitda ken masigurado ti natalged a panagtalon. (Liezle Basa Iñigo/Manila Bulletin//Lito Hilidon/Bannawag)
