Ilunglungalong dagiti kongresman ti nadaras a pannakapasa ti House Bill (HB) No. 2 -- ti singasing a linteg a mangilaksid iti minilion a Filipino nga agtrabtrabaho iti ballasiw-taaw nga agbayad iti kontribusion iti Philippine Health Insurance Corporation (PhilHealth).
Ni Leyte 1st district Rep. Martin Romualdez ti damo a nangipila iti daytoy iti maika-20 a Kongreso, kas naintiempuan a sungbat iti kumarkaro a pinansial a parikut dagiti overseas Filipino worker (OFW) iti baet ti panagngina dagiti magatgatang, nangato a bayad iti remittance, ken nainget a kasasaad iti pagtrabahuan iti pagilian a yanda.
Segun iti HB No. 2, saanen a masapul nga agbayad dagiti OFW iti kontribusion iti PhilHealth, ngem ti nailian a gobierno ketdi ti mangibaklay iti kagudua ti babayadan a kontribusion, ket bayadan met ti employer-da ti kaguduana.
Ania man a di mausar a pondo ket maisubli iti PhilHealth tapno mapasayaat ti benepisio wenno maipababa dagiti babayadan.
Kasapulan ti natibker ken nainkalintegan a pagtaktakderan iti parikut iti WPS --NMC
Kinuna ni daulo ti Committee on Higher and Technical Education Tingog Party-list Rep. Jude Acidre, co-author ti HB No. 2, a nakapila pay laeng ti gakat iti Committee on Health ket tamtamingen ti technical working group.
Kuna dagiti eksperto iti polisia mainaig iti salun-at, maitunos daytoy a gakat iti kasayaatan nga aramid iti sangalubongan, a ti health insurance ket pagguduaan ti employer ken ti gobierno ti pagilian a pagtrabtrabahuan dagiti migrant worker, saan a maipabaklay iti mangmangged. (Ellson Quismorio/Manila Bulletin//Lito Hilidon/Bannawag)
