Dinadael dagiti kameng ti Police Regional Office-1 (PRO-1) ken ti Philippine Drug Enforcement Agency-Region 1 (PDEA-1) ti marihuana nga agbalor iti ₱106.2 a milion a nasamsam iti maysa nga operasion a naisayangkat iti Barangay Licungan, Sugpon, Ilocos Sur manipud Enero 15 agingga 18.
Segun ken ni Police Brig. Gen. Dindo R. Reyes, PRO-1 regional director, natakuatanda ti 98 a plantasion ti marihuana nga aglawa iti 72,676 square meter.
Dinadael dagiti autoridad ti 397,669 a dadakkelen a mula a marihuana, 194,215 a marijuana seedlings, ken 156 a kilo ti nagango a bulong ti marihuana nga agbalor iti ₱106,289,680.
Naaramid ti imbentario, dokumentasion, ken pannakapuor dagiti nasamsam a marihuana iti imatang dagiti opisial ti barangay. Nangala ti sample ti marihuana dagiti polis ken PDEA tapno maeksamen iti crime laboratory.
TAO, LUGAR, PASAMAK: Sadiay Salomague
Segun ken ni Reyes, im-imbestigarenda no asino ti akinkukua iti daga a nakaimulaan iti marihuana ta awan ti natiliwda a suspek iti naisayangkat nga operasion. (Freddie Lazaro/Manila Bulletin//Lito Hilidon/Bannawag)
