Indauluan ni bise gobernador ti Isabela Francis Faustino Dy ti pannakalukat ti Bambanti Festival 2026 idi Domingo, Enero 18, iti Isabela Provincial Capitol Compound iti Siudad ti Ilagan, a pannakairugi ti tinawen a selebrasion ti probinsia a mangpadayaw iti agrikultura, kultura, ken turismo.
Kinuna ni Dy a ti makalawas a piesta, mangpadayaw kadagiti mannalon ti Isabela ken kas panagyaman kadagiti parabur iti probinsia.
Kinunana nga agtalinaed ti gobierno probinsial, babaen ti liderato ni Gobernador Rodito Albano, a mangpapigsa iti agrikultura ken mangsuportar kadagiti lokal a komunidad.
Ti Bambanti Festival, a nairugi idi 1997, ti flagship cultural event ti Isabela a maang-angay tunggal Enero tapno selebraran ti kalabon ti apit ti agrikultura ti probinsia.
Kasapulan ti natibker ken nainkalintegan a pagtaktakderan iti parikut iti WPS --NMC
Isimbolo ti "bambanti" ti kinagaget ken kinaandur dagiti mannalon nga Isabelino a mangsalsalaknib ken mangtartaraken kadagiti mulada (a pagay, mais, natnateng, kdp.).
Nagyaman ni Dy, director general ti festival, kadagiti dimmar-ay manipud iti gobierno nasional, a pakairamanan ni Department of Tourism Regional Director Troy Alexander Miano ken Department of Trade and Industry Regional Director Maria Sofia Narag, iti panangsuportarda iti nasao nga aktibidad.
Binigbigna met dagiti lokal nga opisial manipud iti 34 a munisipalidad ken tallo a siudad ti Isabela, agraman dagiti provincial department heads ken festival committees, iti akemda iti panangorganisar iti selebrasion.
Ti pannakalukat ket nangitampok kadagiti eksibit ti ecotourism, dagiti lokal a produkto ti talon, dagiti tagilako, ken dagiti higante a bambanti a naidispley iti Bambanti Village. (Liezle Basa Iñigo/MANILA BULLETIN)
