Tuladen koma dagiti dadduma pay nalatak a tattao a nairaman iti anomalia ti flood control project ti inaramid ni dati a senador Bong Revilla a simmuko iti Philippine National Police (PNP) sumagmamano nga oras kalpasan a naipulog ti warrant of arrest kontra kenkuana mainaig iti binilion a flood control project iti Bulacan, kinuna ti daulo ti PNP, ita nga aldaw, Enero 20.
Kinuna ni acting PNP chief Lt. Gen. Jose Melencio C. Nartatez a napan ni Revilla iti Camp Crame iti Quezon City idi rabii iti Lunes (Enero 19), a kaduana ti kaingungotna, annak, ken ti abogadona.
Segun ken ni Nartatez, kastoy ti rumbeng nga aramiden dagiti naidarum iti kriminal a kaso kas panangraem iti panagturay ti linteg ken legal a proseso.
Kinuna ni Nartatez a raemen ken naanus ti PNP kadagiti mangannurot iti linteg ken iti legal a proseso, ngem naingetda kadagiti mangkarit ken saan a mangsurot iti linteg.
Di maideklarar a SALN, umdas a pakaikkatan ti impeachable official
Kinuna daytoy ni Nartatez iti baet ti isaysayangkatda nga operasion a mangipatungpal iti warrant of arrest kontra kadagiti nalatak a personalidad a kas kada Charlie “Atong” Ang, dati a kongresman Zaldy Co, dati a presidential spokesman Harry Roque, ken dati a hepe ti Bureau of Corrections Gerard Bantag.
Segun ken ni Nartatez, binilinnan ti Criminal Investigation and Detection Group (CIDG) a mangipatungpal iti arrest warrant nga impaulog ti Sandiganbayan kontra kadagiti dadduma pay nga akusado iti anomalia ti flood control project. (Aaron Recuenco/Manila Bulletin//Lito Hilidon/Bannawag)
