Maibilangen a "retirado" ni police general Nicolas Torre III iti Philippine National Police (PNP) kalpasan nga inawatna ti panangdutok kenkuana ni Presidente Marcos Jr. a kas general manager ti Metropolitan Manila Development Authority (MMDA).
Maibasar iti General Order (GO) ti PNP idi Enero 19, maibilang ni Torre a kas “optionally retired” idi Disiembre 26 gapu iti pananganamong ti National Police Commission (Napolcom).
Nadakamat iti isu met laeng a GO a naaprobaran ti 5th longevity pay ken retirement benefit a maipaay iti four-star general a ranggo ni Torre.
Nadutokan ni Torre a kas hepe ti PNP idi Hunio 2025, ti umuna patanor ti PNP Academy a nagakem iti kangatuan a saad ti polis iti pagilian.
Committee on Justice ti Kamara, kabaelanda a tamingen ti dua nga impeachment complaint
Mapapati a naital-o ni Torre gapu iti nagapuananna iti pannakaarestar ni Kingdom of Jesus Christ pastor Apollo Quiboloy ken ti pannakayimplementar iti arrest warrant ni dati a presidente Rodrigo Duterte, a nakadetinar itan idiay The Hague, Netherlands.
Idi Agosto 2025, naikkat ni Torre a kas daulo ti PNP gapu iti mapapati a riri iti pannakaorganisar ti PNP.
Gapu ta maysa laeng nga opisial ti agikut iti four-star a ranggo iti PNP, ti opisial a panagretiro ni Torre ti mangitunda iti pannakaipaay iti four-star a ranggo ken ni Police Lt. Gen. Jose Melencio C. Nartatez, Jr.
Ni Nartatez ti three-star general nga adda iti kangatuan a saad iti PNP ken agpapaay laeng a kas "acting chief." (Aaron Recuenco/Manila Bulletin//Lito Hilidon/Bannawag)
