Indarum da dati a Senador Antonio "Sonny" Trillanes ken siam pay a complainant ti kaso a plunder, graft, ken dadduma pay a kaso a kriminal ni Bise Presidente Sara Duerte iti Office of the Ombudsman (OMB) idi Enero 21.
Nairaman a complainant da Jocelyn Marie Acosta, Margaret Corazon Aquino, Ruby Anne Gonzales, Lucilyn Mersado, Casilda Guevarra, Epifanio Ramirez Jr., Annie Bartolome, Gay Benueza, ken Evelyn Abella.
Naidarum ni Duterte saan laeng a kas bise presidente, no di ket pay kas dati a nangidaulo iti Department of Education (DepEd,) ken kas mayor idi ti Davao City.
Segun ken ni Trillanes ken iti grupona, linabsing ni Duterte ti Republic Act No. 7080, wenno ti Anti-Plunder Act; RA 3019, (Anti-Graft and Corrupt Practices Act); RA 6713, ti Code of Conduct and Ethical Standards for Public Officials and Employees; ti Revised Penal Code mainaig iti direct/indirect bribery; RA 9160, wenno ti Anti-Money Laundering Act; ken RA 1379, wenno Forfeiture Law.
Kasapulan ti natibker ken nainkalintegan a pagtaktakderan iti parikut iti WPS --NMC
Maysa kadagiti dinakamatda ti maipagarup nga inaramid ni Duterte bayat ti panagpaayna nga opisial ti gobierno, kas iti di umisu a pannakausar ti confidential and intelligence funds (CIF) a naited idi 2022 (₱125 a milion) ken idi 2023 (₱500 a milion).
Gapu itoy, kayatda a maikkat koma ni Duterte iti akemna, idinto a patienda a saanen a kabaelan ni Duterte ti agakem a kas bise presidente gapu iti mental ken moral a kasasaadna. (Czarina Nicole Ong Ki/Manila Bulletin//Lito Hilidon/Bannawag)
