Imbilin ti Land Transportation Franchising and Regulatory Board (LTFRB) ti napardas a pannakaiproseso ti panagbayad iti insurance kadagiti tallo a natay gapu iti panagdinnungpar ti trak ken dyipni iti Isabela idi Enero 21.
Kuna ni LTFRB chairman Vigor D. Mendoza II a nairaman iti pammilin dagiti walo pay a nadangran iti nasao nga aksidente a napasamak iti national highway iti ili ti Luna, Isabela.
Segun ken ni Mendoza, binilinnan ti regional director ti LTFRB ti Cagayan Valley Region para iti pannakaipaay iti amin a kita ti tulong tapno napardas ti pannakairuar ti bayad ti insurance babaen ti pannakikoordinarda iti Passenger Accident Management & Insurance Agency, Inc. (PAMI).
Maibasar iti immuna nga imbestigasion, saan a nakontrol ti drayber ti trak ti luganna gapu iti kapardasna ken nagalis a kalsada isu a nadungparna ti para pasahero a dyipni a kasinnabatna.
Kasapulan ti natibker ken nainkalintegan a pagtaktakderan iti parikut iti WPS --NMC
Gapu iti napigsa a panagdungpar dagiti dua a lugan, naikkat pay ti atep ti dyipni ken nakaigapu iti pannakaipuruak dagiti pasahero iti ruar ti lugan.
Kuna ni regional director ti LTFRB Cagayan Valley Region Richard Dayag a rinugiandan ti nakikoordinar iti kooperatiba ti transportasion nga akinkukua ken mangimatmaton iti dyipni ken iti PAMI tapno mapapardas ti pannakairuar ti bayad ti insurance.
Maibasar iti insurance, adda ₱400,000 a maawat tunggal maysa a natayan, idinto nga agingga iti ₱100,000 ti mabalin a maala dagiti nadangran a biktima.
Kas paset ti linteg, naipaulog ti show cause order (SCO) iti operator ti dyipni a paset ti imbestigasion tapno makita ti kasasaad ti dyip, no mabalin pay nga usaren iti kalsada. (Aaron Recuenco/Manila Bulletin//Lito Hilidon/Bannawag)
