Nailanad ti Siudad ti Baguio ti kababaan a temperaturada ita a panawen ti amian (northeast monsoon) nga immabot iti 11 degrees Celsius, segun iti Philippine Atmospheric, Geophysical and Astronomical Services Administration (PAGASA), ita nga aldaw, Enero 22.
Kinuna ni PAGASA weather specialist Chenel Dominguez a pumigsa pay ti epekto ti amian ita a lawas.
Nakarikna ti nasalemsem a panawen itay agsapa, iti Basco, Batanes (15.8°C); Tanay, Rizal (17.2°C); Malaybalay, Bukidnon (18°C); San Ildefonso, Bulacan (18.6°C); Tuguegarao City, Cagayan (18.7°C); Calayan, Cagayan ken Sinait, Ilocos Sur (18.9°C); Casiguran, Aurora (19.2°C); ken iti Baler, Aurora (19.5°C).
Iti sumaruno a 24 nga oras, marikna ti naulep a tangatang a buyogen ti bassit a tudo iti Cordillera Administrative Region (CAR), Cagayan Valley, Caraga, Aurora, Quezon, Marinduque, Oriental Mindoro, Camarines Norte, Camarines Sur, Northern Samar, ken Eastern Samar.
₱800 a nayon iti binulan a sueldo dagiti katulongan iti NCR, marugian inton Pebrero 7
Iti sabali a bangir, impakdaar ti PAGASA a nagbalin laengen a low-pressure area (LPA) ni Tropical Depression Ada (international name: Nokaen) nga adda iti 1,156 a kilometro iti daya ti abagatan a daya ti Luzon.
Nupay adda pay laeng ni Ada iti Philippine Area of Responsibility (PAR), awanen ti direkta nga epekto daytoy iti ania man a paset ti pagilian. (Ellalyn De Vera-Ruiz/Manila Bulletin//Lito Hlidon/Bannawag)
