Manayonan ti ₱800 ti binulan a matgedan dagiti katulongan iti balay (kasambahay) nga agpapaay iti Metro Manila mangrugi inton Pebrero 7, segun iti waragawag ti Department of Labor and Employment (DOLE) kalpasan a maipaulog ti baro a regional wage order.
Naaprobaran ti ingangato ti matgedan babaen ti Wage Order No. NCR-DW-06 nga impaulog ti Regional Tripartite Wages and Productivity Board (RTWPB).
Babaen daytoy, maingato ti minimum wage dagiti katulongan iti National Capital Region (NCR) manipud iti agdama a ₱7,000 agbalin a ₱7,800.
Maipakat ti baro a sueldo kadagiti amin nga agpapaay a katulongan iti balay, direkta man nga empleado wenno babaen ti lisensiado a private employment agencies (PEA).
Kasapulan ti natibker ken nainkalintegan a pagtaktakderan iti parikut iti WPS --NMC
Para kadagiti katulongan a nagdalan iti PEA, ibaklay ti household principal wenno klienteda ti napabaro a sueldo, ket masapul nga agparang daytoy nga ingangato ti sueldo iti kontratada.
Madusa ti PEA agraman ti kliente wenno empleado a di mangtungpal iti naimandar a pannnakaingato iti binulan a matgedan dagiti katulongan.
Impaganetget ti RTWPB a maimandar daytoy a panagngato ti sueldo kadagiti amin a balay iti Metro Manila. (Trixee Rosel/Manila Bulletin//Lito Hilidon/Bannawag)
